Украінская дэлегацыя накіроўваецца на перамовы ў Беларусь

Трэці раўнд украінска-расійскіх перамоваў пачнецца ў Беларусі 7 сакавіка ў 17:00 па Мінску (16:00 па Кіеве). Украінская дэлегацыя ўжо выправілася ў Белавежскую пушчу. Зменаў у яе складзе няма, паведамляе дарадца кіраўніка Офісу прэзідэнта Украіны Міхаіл Падаляк.

Раней у Беларусі прайшлі два раўнды ўкраінска-расійскіх перамоваў: першы — 28 лютага, другі — 3 сакавіка. Тым часам у Кіеве загінуў Дзяніс Кірэеў, член украінскай дэлегацыі на перамовах з Расіяй у першым раўндзе.

10 сакавіка ў Анталіі можа прайсці трохбаковы саміт з удзелам кіраўнікоў МЗС Расіі Сяргея Лаврова, Украіны Дзмітрыя Кулебы і Турцыі Меўлюта Чавошоглу. Гэта была б першая сустрэча паміж высокімі прадстаўнікамі Украіны і РФ па-за працэсам перамоў дэлегацый у Беларусі.