У Жодзіне ў актывіста БХД адбыўся ператрус

У Жодзіне ў кватэры актывіста аргкамітэта па стварэнні партыі "Беларуская Хрысціянская дэмакратыя" Юрыя Жылко міліцыя правяла ператрус. У кватэры цяпер пражывае моладзевы актывіст Павел Красоўскі.
Як паведаміў БелаПАН, супрацоўнікі міліцыі заявілі, што шукаюць
наркотыкі і зброю. Міліцыянты канфіскавалі літаратуру хрысціянскай,
экалагічнай і грамадскай тэматыкі, буклеты ды іншыя матэрыялы БХД,
дыскі з фільмам Юрыя Хашчавацкага "Плошча".

Сустаршыня аргакамітэту па стварэнні БХД Аляксей Шэін у каментары Еўрарадыё адзначыў, што ператрус можа мець дзве прычыны.

Шэін: “Можа быць, гэта звязана з той асобай, у якой адбываецца
ператрус. Павел Красоўскі — ён з'яўляецца сябрам "Маладога Фронту" і
чалавекам дастаткова актыўным. Быў калісьці арыштаваны ў Віцебску,
сядзеў у СІЗА”.

Другой верагоднай прычынай ператрусу Аляксей Шэін лічыць пераслед
актывістаў Беларускай хрысціянскай дэмакратыі.

Нагадаем, што нядаўна
партыя рабіла спробу зарэгістравацца, але безвынікова.