У збітых украінцамі расійскіх самалётах і верталётах было не 9, а 11 чалавек
Збіты расійскі верталёт / Скрыншот з відэа
У збітых 13 траўня на Браншчыне расійскіх двух самалётах (Су-34 і Су-35), а таксама ў двух верталётах (Мі-8МТПР-1) было не 9, а 11 чалавек, паведамляюць расійскія прапагандысты. Спачатку сцвярджалася, што экіпажы верталётаў складалі тры чалавекі, насамрэч — чатыры. У іх склад уваходзілі аператары апаратуры радыёэлектроннай барацьбы.
З экіпажаў ніхто не выжыў. У пошуках целаў загінулых улады Браншчыны прасілі дапамогі мясцовых жыхароў.
Расійскія ўлады дагэтуль афіцыйна не прызналі, што за адзін дзень былі збітыя два самалёты і два верталёты. Аднак 15 траўня падчас нарады з вайскоўцамі пра гэта расказаў Аляксандр Лукашэнка. Паводле яго слоў, пасля здарэння ў Беларусі войскі супрацьпаветранай абароны былі прыведзены ў павышаную баявую гатоўнасць.
Эксперты мяркуюць, што расійская авіягрупа, якая ўдзельнічала ў абстрэлах Украіны, трапіла ў засаду, якую арганізавала ўкраінская супрацьпаветраная абарона.
