У Віцебску масава звальняюць тых, хто падпісваўся за вылучэнне Бабарыкі

У Віцебску масава звальняюць людзей, якія ў 2020 годзе падпісваліся за вылучэнне Віктара Бабарыкі на прэзідэнцкіх выбарах, пішуць праваабаронцы "Віцебскай Вясны".

Паведамленні пра звальненні паступаюць ад работнікаў розных віцебскіх прадпрыемстваў. Пад звальненне трапляюць самыя розныя людзі — ад прыбіральшчыцы да начальніка цэха.

Па звестках праваабаронцаў, звольненым кажуць, што "паступіў загад разабрацца". Пры гэтым улады не зважаюць на тое, што збор подпісаў за вылучэнне Бабарыкі на прэзідэнцкія выбары ў 2020-м адбываўся на абсалютна законных падставах.

Падчас збору подпісаў за вылучэнне на прэзідэнцкія выбары людзі пакідалі свае пашпартныя звесткі. Па іх цяпер і звальняюць.

Віктар Бабарыка быў затрыманы з сынам Эдуардам 18 чэрвеня 2020 года, калі вёз у Цэнтрвыбаркам здаваць сабраныя ў сваю падтрымку подпісы. У ліпені 2021-га яго асудзілі на 14 гадоў, абвінаваціўшы ў адмыванні грошай і атрыманні хабару. Бабарыка віну не прызнаў. Праваабаронцы прызналі яго палітвязнем.