У Варшаве сёння хаваюць Войцеха Ярузэльскага

Пахаванне генерала Войцеха Ярузэльскага, які памёр 25 траўня, адбудзецца пасля жалобнай імшы ў адным з каталіцкіх касцёлаў у сталіцы Польшчы. Факт, што аднаго з найбольш вядомых камуністычных палітыкаў, які пры жыцці неаднойчы падкрэсліваў свой атэізм, пахаваюць пасля жалобнай імшы, выклікаў немалую сенсацыю ў Польшчы.

На гэтым тыдні ў Польшчы чуліся заклікі з боку некаторых палітыкаў правага крыла не дапусціць пахавання генерала Ярузэльскага на “Павонзках”, арганізаваўшы там масавую малельную сустрэчу і заблакаваўшы доступ да могілак.

Генерал Войцех Ярузэльскі быў першым сакратаром Польскай аб’яднанай рабочай партыі, прэм’ер-міністрам і міністрам абароны Польшчы ў камуністычны перыяд. 13 снежня 1981 ён увёў у краіне ваеннае становішча, ізаляваўшы ў месцах адасаблення каля дзесяці тысяч дзеячаў прафсаюзу “Салідарнасць”. Падчас ваеннага становішча ў сутычках з міліцыяй загінула некалькі дзясяткаў чалавек.

У 1989 годзе Войцех Ярузэльскі ў выніку дамовы з апазіцыяй давёў да першых часткова дэмакратычных выбараў у камуністычнай Польшчы, стаў апошнім прэзідэнтам Народнай Польшчы (1989) і першым прэзідэнтам посткамуністычнай Польскай Рэчы Паспалітай (1989-1990).

Лех Валенса, якога Войцех Ярузэльскі зняволіў амаль на год пасьля ўвядзення ваеннага становішча, публічна прымірыўся з генералам і наведаў яго падчас хваробы ў шпіталі, нагадвае Радыё Свабода.