У Варшаве прайшоў марш "Яе звалі Ліза"
У маршы ўдзельнічала больш за тысячу чалавек / Euroradio
Увечары 6 сакавіка ў Варшаве прайшоў марш "Яе звалі Ліза". Сярод арганізатараў акцыі беларускія феміністкі, польскія і ўкраінскія арганізацыі. Каля тысячы чалавек прыйшлі на месца злачынства, дзе адбыўся напад на беларуску (там стварыўся стыхійны мемарыял). А пасля яны прайшлі па вуліцах польскай сталіцы, людзей стала яшчэ больш. Удзельнікі ўшанавалі памяць беларускі.
Напад на 25-гадовую Лізу адбыўся ў ноч на нядзелю, 25 лютага, у цэнтры Варшавы. Нападнік згвалтаваў яе і спрабаваў задушыць (пазней падазраванага затрымалі, яму пагражае пажыццёвае зняволенне). Некалькі дзён яна была ў крытычным стане, на апараце штучнай вентыляцыі лёгкіх. Пра смерць Лізы стала вядома 1 сакавіка.
Пасля смерці Лізы ў Польшчы абмяркоўваецца магчымасць увядзення больш жорсткага пакарання для вінаватых у сексуальных злачынствах.
