У Светлагорску мужчына расстраляў з абрэза аўтамабіль
Пасля сваркі з былой жонкай 53-гадовы жыхар горада выпіў дзве бутэлькі віна, узяў з сабой абрэз паляўнічай стрэльбы і пайшоў у лес.
Але па дарозе ён вырашыў зайсці ў краму, каб купіць прадукты. Аднак яшчэ на падыходзе адчуў моцнае ап'яненне, таму што да гэтага часу доўга не ўжываў спіртнога. Таму мужчына не памятае, што адбылося далей.
Паводле паказанняў прадаўцоў, мужчына папрасіў дзве бутэлькі гарэлкі, але плаціць за іх адмовіўся, сказаў, што будзе рабаваць краму. Прадаўцы схаваліся ў бакоўцы і выклікалі міліцыю. Тым часам мужчына выйшаў з крамы, не ўзяўшы гарэлку, і стрэліў некалькі разоў з абрэза ў прыпаркаваную побач машыну, у якой нікога не было.
Неўзабаве міліцыя затрымала хулігана. Распачатая крымінальная справа па артыкуле "хуліганства, учыненае з ужываннем зброі". Мужчына можа трапіць за краты на тэрмін ад трох да дзесяці гадоў. Дарэчы, раней ён судзімы не быў, інфармуе БелаПАН.
Фота — Fotolia