У Слоніме аштрафавалі кандуктараў аўтобусаў, якія працавалі без масак
![Абавязковы масачны рэжым у Беларусі па патрабаванні Аляксандра Лукашэнкі адмянілі, але некаторыя патрабаванні засталіся / БЕЛТА](/sites/default/files/styles/gallery_main/public/2023-08/mask_20_12.jpg.webp?itok=69FLgPSE)
Абавязковы масачны рэжым у Беларусі па патрабаванні Аляксандра Лукашэнкі адмянілі, але некаторыя патрабаванні засталіся / БЕЛТА
У Слоніме аштрафавалі кандуктараў і кіроўцаў грамадскага транспарту, якія выходзілі на маршрут без масак, піша "Газета Слонімская".
Выданне нагадвае, што знаходзіцца без маскі ў грамадскім месцы можна, калі там ёсць магчымасць выконваць дыстанцыю 1,5-2 метры. У кіроўцаў і кандуктараў у грамадскім транспарце такой магчымасці няма. Яны павінныя насіць маскі.
З пачатку года Слонімскі занальны цэнтр гігіены і эпідэміялогіі правёў 27 праверак транспартных арганізацый, якія займаюцца перавозкай пасажыраў. Па іх выніках было выпісана 15 рэкамендацый, сфармулявана некалькі хадайніцтваў аб прыцягненні да дысцыплінарнай адказнасці, 6 чалавек пакаралі.
У дачыненні да кандуктараў і кіроўцаў, якіх паўторна злавілі на ігнараванні супрацьэпідэмічных правілаў, складзеныя тры адміністрацыйныя пратаколы.
Эпідэміёлагі нагадваюць, што з улікам пандэміі і сезону грыпу насіць маскі ў грамадскіх месцах мае сэнс і пасажырам.
Абавязковы масачны рэжым у Беларусі быў адменены ў кастрычніку пасля нарады ў Аляксандра Лукашэнкі. Патрабаванне насіць маскі ва ўмовах пандэміі ён назваў "здзекам з людзей". Пазней ён развіў думку і сказаў, што масачны рэжым адмянілі, таму што людзі проста не ўмеюць правільна насіць маскі.
Каб сачыць за галоўнымі навінамі, падпішыцеся на канал Еўрарадыё ў Telegram.
Мы штодня публікуем відэа пра жыццё ў Беларусі на Youtube-канале. Падпісацца можна тут.