У Расіі разбіўся далёкі стратэгічны бамбавік-ракетаносец
Ту-22М3 упаў у Іркуцкай вобласці / Мінабароны РФ
15 жніўня ў Расіі разбіўся далёкі стратэгічны бамбавік-ракетаносец Ту-22М3. Здарэнне адбылося ў Іркуцкай вобласці. Яго прычынай назвалі "тэхнічную няспраўнасць".
Экіпаж самалёта паспеў катапультавацца. Сцвярджаецца, што на зямлі разбурэнняў няма, паколькі Ту-22М3 упаў у бязлюднай мясцовасці.
У красавіку 2024-га ўкраінскія вайскоўцы заявілі, што ўпершыню збілі Ту-22М3, носьбіт крылатых ракет Х-22, якімі расіяне б'юць па мірных украінскіх гарадах. Ён упаў у Стаўрапольскім краі, а лётчыкі паспелі катапультавацца. Кіраўнік Галоўнага ўпраўлення разведкі Мінабароны Украіны Кірыл Буданаў тады сказаў, што самалёт збілі на адлегласці 308 км.
Ту-22М3 быў распрацаваны яшчэ ў савецкі час. Ён каштуе каля 300 млн долараў, можа несці ядзерную зброю. У ліпені 2024-га ФСБ РФ заявіла, што была спроба ўгнаць за мяжу Ту-22М3.
