У Расіі гарэў, а пасля патануў чыгуначны паром з паліўнымі цыстэрнамі

У Расіі ў Краснадарскім краі ў порце "Каўказ" гарэў чыгуначны паром з 30 паліўнымі цыстэрнамі. Расіяне заявілі, што ў чацвер па ім нанеслі ўдар Узброеныя сілы Украіны (нібыта, гэты была ракета "Няптун", запушчаная з Адэскай вобласці). Дым высока падымаўся над Керчанскім пралівам. Рух па Крымскім мосце быў перакрыты. Для тушэння цыстэрнаў з гаруча-змазачнымі матэрыяламі ў порт "Каўказ" накіравалі пажарны цягнік. Пазней стала вядома, што паром патануў.

Паліва было прызначана для перапраўкі ў акупаваны Крым для расійскага войска.

Тым часам у Пралетарску ў Растоўскай вобласці РФ пяты дзень гарыць вялізная нафтабаза, якую атакавалі дроны.