У прэзідэнцкі фонд лезуць напярэдадні крызісу: Чалы пра фінансаванне бюджэтнікаў
Удакладнены дэфіцыт бюджэту ў 2021 годзе — 6 млрд рублёў / Еўрарадыё
Вылучэнне 206,53 млн рублёў з рэзервовага фонду прэзідэнта на падвышэнне заробкаў бюджэтнікам гаворыць пра тое, што грошай у бюджэце становіцца ўсё менш, лічыць незалежны аналітык Сяргей Чалы.
— У нас было не так шмат выпадкаў, калі залазілі ў гэты рэзервовы фонд прэзідэнта, памеру якога не ведае нават Мінфін. Першы такі выпадак датуецца 2009 годам.
Тады трэба было скончыць год без дэфіцыту бюджэту, каб праграма супрацоўніцтва МВФ з Беларуссю была ўхваленая.
— Нягледзячы на ўсталяваныя сумы, пытанне — што будзе, калі гэтыя сродкі скончацца. Мабыць, яны [ўлады. — Еўрарадыё] разлічваюць, што неабходнасць у надбаўках, звязаных з лячэннем каранавіруса, знікне. Разглядаецца, мабыць, распрацоўшчыкамі гэтага ўказа, што гэта не так надоўга спатрэбіцца. Добра, паглядзім. Мы ж ведаем, што Беларусь вельмі моцна адстае па тэмпах вакцынацыі і небяспека распаўсюджвання новага штама па-ранейшаму высокая, — кажа Сяргей Чалы.
Згодна з пастановай Саўміна №460 ад 12 жніўня 2021 года, Мінфін вылучыць 206,53 млн на павышэнне заробкаў бюджэтнікам. Ва ўмовах дэфіцыту бюджэту гэтыя грошы будуць узятыя з рэзервовага фонду прэзідэнта Беларусі.
Сродкі будуць накіраваныя ў тым ліку Рэспубліканскаму шпіталю і абласным медслужбам Дэпартамента фінансаў і тылу МУС, рэспубліканскім навукова-практычным цэнтрам, вайсковым часцям і медустановам Мінабароны, рэспубліканскім установам аховы здароўя.
