У прапагандыста Мукавозчыка спыталі, чаму ягоная дачка жыве і працуе ў ЗША
Андрэй Мукавозчык / sb.by
У прапагандыста Андрэя Мукавозчыка спыталі, чаму ягоная дачка жыве і працуе ў ЗША, супраць якіх так актыўна выступае ён сам. Відэа з'явілася на YouTube-канале "Партызанская хваля".
Аўтары канала нагадалі, што Марыя — дачка ад былога шлюбу Мукавозчыка. Спярша яна ў ЗША навучалася, а цяпер працуе там хімікам.
Мастак і пранкер Уладіслаў Бохан запытаўся ў Мукавозчыка: "Чаму яна не хоча вярнуцца ў Беларусь?".
На гэта прапагандыст стаў выкручвацца: "Я б вам патлумачыў... Вам зразумець-то няма чаго. Ужо не атрымаецца. Калі з 2020-га да 2023-га не атрымалася, ну якія шанцы далей? Ніякіх".
Разважаць на тэму вяртання дачкі ў Беларусь ён адмовіўся і прапанаваў, каб усе пытанні задавалі непасрэдна ёй.
"Я як бацька, патрыёт і ўсё астатняе. І што? Вы няздольныя зразумець нават такіх простых рэчаў, да чаго і як. Не атрымліваецца растлумачыць. Вам бы дакалупацца", — пакрыўдзіўся Мукавозчык.
