У Міёрскім раёне сёлета за "экстрэмізм" судзілі 25 чалавек
Міёрскія міліцыянеры / mijory.by
У Міёрскім раёне Віцебскай вобласці за 11 месяцаў за "экстрэмізм" судзілі 25 чалавек. Як пішуць "Міёрскія навіны", для мясцовай міліцыі выяўленне "асоб, якія займаюцца вырабам, распаўсюдам, захоўваннем і перавозкай інфармацыйнай прадукцыі, што ўтрымлівае заклікі да экстрэмісцкай дзейнасці", стала адным з важных напрамкаў дзейнасці.
Згаданых людзей пакаралі за рэпосты і лайкі публікацый з інфармацыйных рэсурсаў, якія ў РБ прызналі "экстрэмісцкімі". Некаторых з іх адпраўлялі пад адміністрацыйны арышт, іншых — штрафавалі. Вядома, што за "экстрэмізм" ў лістападзе арыштавалі галоўнага ветэрынара Міёрскага раёна, а нядаўна за тое самае аштрафавалі працаўніцу мясцовай бальніцы.
