У Мінску навукоўца асудзілі на 3,5 года за "негатыўныя каментары" ў сацсетках
Мінскі гарадскі суд / Яндэкс
На 3,5 года калоніі агульнага рэжыму асудзілі ў Мінскім гарадскім судзе навуковага супрацоўніка Інстытута генетыкі і цыталогіі Нацыянальнай акадэміі навук, актывіста Свабоднага прафсаюза беларускага (СПБ) Аляксандра Кандрацюка, паведамляюць праваабаронцы.
Справу разглядала суддзя Анжэла Касцюкевіч. Дзяржабвінаваўца — пракурор Далідовіч.
Навукоўца абвінавацілі па трох артыкулах Крымінальнага кодэкса — ч. 1 арт. 130 (распальванне сацыяльнай варожасці альбо варажнечы), арт. 368 (абраза Лукашэнкі) і ч. 1 арт. 369 (дыскрэдытацыя Рэспублікі Беларусь). Бок абвінавачання заявіў, быццам Кандрацюк пакідаў у сацсетках "негатыўныя каментары", які дыскрэдытавалі ўладу і абражалі Лукашэнку.
Навукоўца затрымалі 5 верасня 2022 года разам з іншымі супрацоўнікамі Інстытута генетыкі і цыталогіі НАН. Спярша яму прысудзілі 13 сутак адміністрацыйнага арышту, але на волю Кандрацюк пасля гэтага не выйшаў — на яго пачалі крымінальную справу.
