У Мінску адсочваюць сітуацыю з затрыманнем беларускіх графітыстаў на Балі
Міністэрства замежных спраў Беларусі адсочвае сітуацыю з затрыманнем беларускіх графітыстаў на востраве Балі. Пра гэта БЕЛТА паведаміў начальнік упраўлення інфармацыі, прэс-сакратар МЗС Дзмітрый Мірончык. Паводле яго слоў, грамадзяне нашай краіны знаходзяцца ў пастаянным кантакце з ганаровым консулам Беларусі ў Інданэзіі. Супрацоўнік ганаровага консульства ўжо выехаў на Балі. МЗС працуе над тым, каб правы беларусаў выконваліся, а канфлікт быў урэгуляваны, адзначыў Мірончык.
12 красавіка беларусаў на востраве затрымала мясцовая іміграцыйная служба, пасля адпусціла, але пакінула ў сябе дакументы. Нашых землякоў абвінавачваюць у незаконнай прадпрымальніцкай дзейнасці.
Балі — востраў у Малайскім архіпелагу. На карце свету яго можна пабачыць на поўнач ад Аўстраліі. Насельніцтва вострава складае больш за 4 млн чалавек.
