У мінскім аэрапорце сістэму надгляду мяняюць на кітайскую

Кітай паставіць у Мінск два комплексы надгляднага абсталявання для Нацыянальнага аэрапорта Мінск. Гэта прадугледжана пастановай урада, апублікаванай на Нацыянальным прававым інтэрнэт-партале. У ёй гаворыцца пра беларуска-кітайскую дамову аб тэхніка-эканамічнай дапамозе.

Падпісваць адпаведны ліст будзе першы віцэ-прэм'ер Мікалай Снапкоў. Па яго словах, кітайскае абсталяванне паступіць у Нацыянальны аэрапорт Мінск праз месяц.

У каментары БЕЛТА Снапкоў прызнаўся, што на ўсталяванне кітайскай сістэмы надгляду багажу афіцыйны Мінск вымусілі санкцыі.

"Была канкрэтная праблема па абслугоўванні багажу ў аэрапорце, бо там стаіць пакуль яшчэ абсталяванне з недружалюбнай краіны. Калі яно ламаецца, узнікаюць сур'ёзныя складанасці ў абслугоўванні пасажыраў у аэрапорце", — заявіў чыноўнік.