У мінскіх школьніц пачаліся праблемы пасля заявы ў міліцыю пра абрабаванне
Пляж / кадр з відэа ГУУС Мінгарвыканкама
Дзве непаўналетнія школьніцы (12 і 14 гадоў) паскардзіліся ў мінскую міліцыю на рабаванне. Яны паведамілі, што адпачывалі каля Цнянскага вадасховішча, а незнаёмцы скралі ў іх паўэрбанкі.
Міліцыянты вывучылі запісы з камер відэаназірання і выявілі падазраваных — 15-гадовага школьніка і 17-гадовага навучэнца каледжа.
Але пры гэтым высветлілася, што самі дзяўчаты падманулі міліцыю. Юнакі скралі ў іх не паўэрбанкі, а электронныя цыгарэты. Падлеткі пазнаёміліся са школьніцамі на пляжы і папрасілі вейпы "ў арэнду". Яны паабяцалі прынесці грошы пазней, але потым проста ўцяклі.
Міліцыянты канфіскавалі электронныя цыгарэты, але дзяўчатам іх не вярнулі. Замест гэтага пачалі праверку, наколькі законна вейпы апынуліся ў саміх дзяўчат. А на юнакоў пачалі крымінальную справу за махлярства.
