У Магілёве студэнтка паспрабавала вылезці з інтэрната праз акно і сарвалася

У Магілёве разбілася 17-гадовая дзяўчына. У навагоднюю ноч яна захацела прагуляцца па горадзе, але выйсці на двор вырашыла праз акно. Падрабязнасці трагедыі паведамляе Следчы камітэт.

Дзяўчына жыве ў студэнцкім інтэрнаце. У ноч на 1 студзеня яна звязала самаробную вяроўку з рэчаў, якія знайшла ў пакоі, і папрасіла суседа прыбраць яе вяроўку ў шафу пасля таго, як яна спусціцца ўніз. Хлопец спрабаваў яе адгаварыць, але дзяўчына запэўніла яго, што ўжо неаднаразова так рабіла.

Яна прывязала вяроўку да батарэі і пачала спускацца. Вяроўка парвалася, і дзяўчына ўпала з чацвёртага паверха.

Цяпер яна ў бальніцы. Медыкі ацэньваюць яе стан як цяжкі. Магілёўскі райаддзел праводзіць праверку па гэтым факце — спрабуе высветліць абставіны здарэння.