У цэнтральных і заходніх абласцях Украіны выбары праходзяць спакойна
У Чарнігаўскай, Львоўскай, Хмяльніцкай, Сумскай і Жытомірскай абласцях Украіны галасаванне на парламенцкіх выбарах пачалося своечасова.
На Чарнігаўшчыне ахову грамадскага парадку на выбарчых участках забяспечваюць 1 тысяча 644 міліцыянты. Разам з імі дзяжураць 1 120 сябраў грамадскіх фармаванняў, перадае УНІАН.
Выканаўца абавязкаў Хмяльніцкай абласной дзяржадміністрацыі Аляксандр Сімчышын сказаў, што скаргаў на працу выбарчых участкаў пакуль не паступала. У вобласці за выбарчым працэсам сочаць даволі шмат міжнародных назіральнікаў.
У Харкаўскай вобласці адзін выбарчы ўчастак адкрыўся са спазненнем, астатнія пачалі працу своечасова — міліцыя правярала інфармацыю аб замініраванні памяшкання.
