У Буда-Кашалёўскім раёне загінуў мужчына: сарваўся з даху кароўніка
У Буда-Кашалёўскім раёне ў вёсцы Бушаўка трагічна загінуў мужчына: ён чысціў дах кароўніка, сарваўся і ўпаў з 10-метровай вышыні. Загінулы — Кірыл Раманаў, былы выратавальнік МНС. Апошнім часам ён працаваў на Гомельскім хімзаводзе. Як пішуць “Сильные новости”, гамельчука накіравалі чысьціць дах кароўніка ў працоўны час.
У сувязі з будучым візітам Аляксандра Лукашэнкі ўсе сілы былі кінутыя, каб упарадкаваць ваколіцы вёскі. Людзі, якія заступалі на змену, не займаліся сваімі наўпроставымі абавязкамі, а ехалі чысціць дахі кароўнікаў. Загінулы мужчына працаваў без страхоўкі. Дах, магчыма, быў зацыраваны нетрывалымі матэрыяламі і ў некаторых месцах правальваўся.
Сваякі загінулага будуць дамагацца праверкі па факце здарэння. Да бацькоў Кірыла Раманава прыязджала кіраўніцтва завода, прапаноўвала сваю дапамогу, расказвала, што тэхніку бяспекі Кірыл праходзіў.
