У Брэсце арыштавалі трэцяга праціўніка акумулятарнага завода

22 красавіка ў судзе Ленінскага раёна Брэста адбыўся суд над Дзмітрыем Бекалюком. Яго вінавацілі ва ўдзеле ў несанкцыянаваным масавым мерапрыемстве.

Бекалюк — адзін з актывістаў, якія пратэстуюць супраць будаўніцтва акумулятарнага завода на ўскрайку Брэста. 12 красавіка некалькі соцень брастаўчан прайшлі маршам па гарадскіх вуліцах: іх абурыла тое, што завод прайшоў дзяржаўную экалагічную экспертызу. Жыхары Брэста лічаць, што  завод "АйПаўэр" — экалагічна шкоднае прадпрыемства. Акцыі пратэсту супраць яго цягнуцца з лютага 2018 года. 

Увечары 17 красавіка Бекалюка затрымалі, выходныя ён правёў у азалятары часовага ўтрымання. Зранку 18 красавіка міліцыя затрымала яшчэ двух актывістаў — Аляксандра Кабанава і Дзмітрыя Андрасюка.

20 красавіка Кабанава і Андрасюка асудзілі на 15 сутак арышту кожнага. А Бекалюк запатрабаваў час на азнаямленне са справай, таму яго суд адклалі да 22-га. 

На працэсе 22 красавіка суддзя Аляксандр Семянчук зачытаў матэрыялы справы: Бекалюк публічна выражаў незадаволенасць дзеючай уладай і заводам. Як паведамляе праваабарончы сайт "Вясна", усе хадайніцтвы Бекалюка суддзя адхіліў і пасля выступу міліцыянтаў-сведкаў прысудзіў яму 15 сутак арышту. 

Каб сачыць за галоўнымі навінамі, падпішыцеся на канал Еўрарадыё ў Telegram.

Мы штодня публікуем відэа пра жыццё ў Беларусі на Youtube-канале. Падпісацца можна тут.