У "Белгазпрамбанку" прайшлі масавыя затрыманні інкасатараў

У "Белгазпрамбанку" адбыліся масавыя затрыманні інкасатараў, піша сайт zerkalo.io.

Паведамляецца, што 6 верасня сілавікі затрымалі 10-11 супрацоўнікаў інкасатарскай службы. Большасць з іх цяпер знаходзяцца на Акрэсціна.

"Усіх абвінавацілі ў непадпарадкаванні міліцыі і далі па 14 сутак", — распавёў журналістам чытач сайта.

Супрацоўнік "Белгазпрамбанка" ананімна пацвердзіў гэтыя звесткі. Па яго словах, затрыманні былі даволі жорсткія, аднаму з затрыманых нібыта за супраціў зламалі плячо ці руку. Дома ў іх адбыліся ператрусы.

Прычыны затрымання супрацоўнік банка дакладна не ведае: "У нас толькі ўрывачныя звесткі. Быццам бы за абразу Лукашэнкі ва ўнутраным чаце. Кажуць, хтосьці зліў іх перапіску".

Сярод затрыманых называюць і начальніка службы інкасацыі банка.

Каб сачыць за галоўнымі навінамі, падпішыцеся на канал Еўрарадыё ў Telegram.

Мы штодня публікуем відэа пра жыццё ў Беларусі на Youtube-канале. Падпісацца можна тут.