У Беларусі вучацца ліквідоўваць наступствы ракетных і авіяўдараў

У Беларусі вучацца ліквідоўваць наступствы ракетных і авіяўдараў умоўнага праціўніка. З 29 траўня ў беларускім войску праводзяцца спецыяльныя вучэнні. Як паведамляе прэс-служба Мінабароны РБ, імі кіруе намеснік міністра абароны па ўзбраенні генерал-маёр Андрэй Федзін. Задзейнічаны органы вайсковага кіравання і вайсковыя часці тэхнічнага забеспячэння, ваеннаабавязаныя, прызваныя ў згаданыя падраздзяленні.

Падчас вучэнняў, якія працягнуцца да 2 чэрвеня, адпрацоўваюцца таксама "пытанні забеспячэння злучэнняў і вайсковых часцей ракетамі і боепрыпасамі, павышэння жывучасці сіл і сродкаў тэхнічнага забеспячэння".

Сёлета ў нашай краіне неаднаразова адпрацоўвалі размеркаванне ваеннай авіяцыі па запасных аэрадромах, у тым ліку грамадзянскіх. Звычайна такія трэніроўкі праходзяць у чаканні вайны і ўдараў праціўніка па ваенных аэрадромах.

У сярэдзіне траўня Аляксандр Лукашэнка заявіў, што ў Беларусі войскі СПА знаходзяцца ў павышанай баявой гатоўнасці. Здарылася гэта пасля знішчэння ўкраінцамі ў Бранскай вобласці расійскай авіягрупы. У Мінску ўважліва сочаць за новымі магчымасцямі Украіны пасля чарговых паставак заходняй вайсковай тэхнікі і ўзбраенняў.