У Беларусі адзначаць Сусветны дзень снегу
Ва ўсіх абласных і ў большасці раённых цэнтраў краіны 18 і 19 студзеня пройдуць мерапрыемствы для аматараў актыўнага адпачынку.
Гэта будуць спартова-масавыя відовішчы для дзяцей і дарослых, для дасведчаных спартсменаў і пачаткоўцаў, інфармуе interfax.by. Па ўсёй краіне пройдуць “снежныя фестывалі”, у часе якіх усе ахвотныя змогуць прыняць удзел у спаборніцтвах на каньках, лыжах і сноўбордах.
Сусветны дзень снегу (яго таксама называюць Міжнародным днём зімовых відаў спорту) — маладое свята. Ініцыятарам яго правядзення ў 2012 годзе выступіла Міжнародная федэрацыя лыжнага спорту. Свята адзначаюць у перадапошнюю нядзелю студзеня, але ў Беларусі падзею “расцягваюць” па ўсе выходныя.