TUT.by: у офісе кампаніі "Грынрозніца" ў Мінску працуюць сілавікі
З раніцы 4 лютага ў мінскім бізнес-цэнтры "Дэльта" (вул. Ціміразева, 72) працуюць сілавікі, піша TUT.by са спасылкай на звесткі чытачоў. Яны дзейнічаюць на трэцім-чацвёртым паверхах, дзе размешчаны офіс кампаніі "Грынрозніца", якой належаць гіпермаркеты Green.
Па словах відавочцаў, сілавікі прыехалі а восьмай гадзіне раніцы. Каля будынка стаіць шэрая "Газэль" з таніраваным шклом.
Якая менавіта структура працуе ў бізнес-цэнтры, пакуль дакладна не вядома. Па словах аднаго з супрацоўнікаў кампаніі "Грынрозніца", гэта спецыялісты Дэпартамента фінансавых расследаванняў Камітэта дзяржкантролю.
"Супрацоўнікі офіса выходзяць папаліць у суправаджэнні гэтых хлопцаў. І вяртаюцца назад", — распавёў адзін са сведкаў.
У фінансавай міліцыі ад каментароў адмовіліся, заявіўшы, што не могуць ні пацвердзіць, ні абвергнуць інфармацыю.
Каб сачыць за галоўнымі навінамі, падпішыцеся на канал Еўрарадыё ў Telegram.
Мы штодня публікуем відэа пра жыццё ў Беларусі на Youtube-канале. Падпісацца можна тут.
