Вы тут

Трэнер хакейнага "Шахцёра" падчас матча біў падлетка, гэта трапіла на відэа

Хакейны трэнер падчас матча біў 13-гадовага хакеіста / кадр з відэа

Падчас таварыскага матча паміж камандамі 2008 года нараджэння хакейных клубаў "Хімік" і "Шахцёр" адбыўся скандальны эпізод. На відэатрансляцыі гульні бачна, як адзін з трэнераў салігорскага "Шахцёра" б'е хлопчыка з каманды. 

Сама гульня прайшла 9 жніўня . Яе трансляцыя была захаваная на YouTube-канале "Дзіцячы хакей Беларусі", але зранку 11 жніўня відэа ўжо выдалілі.

Галоўным трэнерам групы 2008 года нараджэння ў "Шахцёры" з'яўляецца Арцём Гаранін.

Увечары 10 жніўня клуб выклаў афіцыйную заяву, у якой паведаміў, што "праводзіцца службовая праверка і ўсебаковая ацэнка дзеянняў дзіцячага трэнера". Па выніках праверкі ў "Шахцёры" абяцаюць прыняць адпаведныя меры.

Федэрацыя хакея Беларусі таксама выступіла з афіцыйнай заявай. У ёй гаворыцца, што праверкай інцыдэнта займаецца Дысцыплінарны камітэт ФХБ. У Салігорск адправілася намесніца старшыні ФХБ Святлана Марчанка, якая курыруе дзіцячы хакей. 

ФХБ пагражае ўжыць "адпаведныя дысцыплінарныя меры" да людзей, "чыя дзейнасць парушае прынятыя прынцыпы развіцця дзіцячага спорту".

Каб сачыць за галоўнымі навінамі, падпішыцеся на канал Еўрарадыё ў Telegram.

Мы штодня публікуем відэа пра жыццё ў Беларусі на Youtube-канале. Падпісацца можна тут.