Транслітарацыю нельга адмяніць, таму што гэта патрабаванне закона — Матусевіч
![Беларуская лацінка пад пагрозай / the-village.me](/sites/default/files/styles/gallery_main/public/2023-08/z19BORVkdWuZ_pmJMG7LAg.jpg.webp?itok=Tnk9cQoc)
Беларуская лацінка пад пагрозай / the-village.me
Старшыня Дзяржаўнага камітэта па маёмасці Беларусі Дзмітрый Матусевіч заявіў, што сістэма транслітэрацыі геаграфічных назваў у нашай краіне будзе ўдасканалена. Раней у чацвер кіраўнік Адміністрацыі Лукашэнкі Ігар Сергеенка анансаваў разгляд пытання з выкарыстаннем у ёй рускай мовы: "Паступаюць звароты грамадзян па гэтым пытанні, і мы вырашылі разгледзець яго і ўнесці яснасць, як далей выкарыстоўваць рускую мову ў назвах вуліц, населеных пунктаў, у транспарце". З сайта БЕЛТА гэтыя яго словы неўзабаве зніклі.
"У нас ёсць заканадаўчае патрабаванне праводзіць працу па перайменаванні беларускіх найменняў для замежнікаў, якія наведваюць нашу краіну, літарамі лацінскага алфавіту", — цытуе словы Матусевіча БЕЛТА. Ён гэта і распавёў на Савеце па гістарычнай палітыцы, дзе прысутнічаў згаданы Сергеенка.
"У выніку будуць выпрацаваныя пэўныя рашэнні, — працягвае Дзмітрый Матусевіч. — Але транслітарацыю як з'яву гэта не адменіць у любым выпадку. Безумоўна, яна будзе выкарыстоўвацца ў картаграфічных назвах для замежнікаў... Але транслітарацыю нельга адмяніць, таму што гэта патрабаванне закона".
Але, як бывае ў цяперашняй Беларусі, на канчатковае рашэнне могуць паўплываць прапагандысты.
Каб сачыць за галоўнымі навінамі, падпішыцеся на канал Еўрарадыё ў Telegram.
Мы штодня публікуем відэа пра жыццё ў Беларусі на Youtube-канале. Падпісацца можна тут.