Радыкальны ісламісцкі рух "Талібан" забараніў усе палітычныя партыі ў Афганістане, заявіўшы, што іх дзейнасць супярэчыць шарыяту. Міністр юстыцыі ва ўрадзе талібаў Абдул Хакім Шараі ў чацвер, 17 жніўня, аб'явіў аб забароне на прэс-канферэнцыі ў Кабуле.
"У краіне няма шарыяцкай асновы для дзейнасці палітычных партый. Яны не служаць нацыянальным інтарэсам, і народ іх не шануе", — сказаў ён.
Больш за 70 палітычных партый былі зарэгістраваныя ў Мінюсце Афганістана два гады таму — да таго, як талібы вярнулі сабе кантроль над краінай.
Расія вярбуе ў Польшчы шпіёнаў праз інтэрнэт для адсочвання транзіту зброі
Расійскія спецслужбы праз інтэрнэт вярбуюць у Польшчы агентаў, у тым ліку сярод украінскіх бежанцаў, для адсочвання транзіту зброі ва Украіну. Такія вакансіі пачалі з'яўляцца ў інтэрнэце ў пачатку года. Пра гэта піша The Washington Post.
Выданне нагадвае, што раней у Польшчы раскрылі буйную шпіёнскую сетку, якая супрацоўнічае з расiйскімі спецслужбамі. Паводле польскіх следчых, на працягу некалькіх тыдняў агентам было даручана абследаваць польскія марскія парты, размясціць камеры ўздоўж чыгунак і схаваць прылады высочвання ў ваенных грузах. Затым, у сакавіку, паступіў новы загад пусціць пад адхон цягнікі, якія вязуць зброю ва Украіну.
Польскія ўлады цяпер лічаць, што замоўцам было расійскае агенцтва ваеннай выведкі ГРУ і што сарваная аперацыя ўяўляла сабой самую сур'ёзную расійскую пагрозу на тэрыторыі краін NATO з пачатку ўварвання РФ ва Украіну ў мінулым годзе.
Мэта Расіі палягала ў тым, каб сарваць зброевы паток, які праходзіць праз Польшчу: на яго долю прыпадае больш за 80 працэнтаў ваеннай тэхнікі, што пастаўляецца ва Украіну.
"Не маючы магчымасці ці не жадаючы спадзявацца на ўласных аператыўнікаў, Расія сабрала каманду дылетантаў, у тым ліку з дапамогай рускамоўных паведамленняў у Telegram-каналах у Польшчы, якія часта наведваюць украінскія бежанцы. Нават у выпадку няўдачы страты для Масквы мінімальныя: у польскую турму траплялі ў асноўным украінцы, а не аператыўнікі ГРУ", — гаворыцца ў артыкуле.
Агентам абяцалі плаціць ад некалькіх долараў за графіці да 12 долараў за плакат. Паводле інфармацыі, пададзенай польскай выведслужбай, там былі ўлёткі і транспаранты з надпісамі "ПОЛЬШЧА ≠ УКРАІНА", "NATO, ІДЗІЦЕ ДАДОМУ" і "НЕ БАЙДЭНУ".
Паводле афіцыйных асоб, распаўсюд такіх матэрыялаў прадугледжваў дзве мэты: распальванне антыўкраінскіх настрояў у Польшчы, а таксама праверка гатоўнасці навабранцаў выконваць больш сур'ёзныя заданні.
AliExpress — у спісе міжнародных спонсараў вайны
Нацыянальнае агенцтва па папярэджанні карупцыі Украіны ўнесла кітайскую групу кампаній Alibaba Group Holding Limited, якая з'яўляецца ўладальнікам платформы AliExpress, у пералік міжнародных спонсараў вайны ў сувязі з тым, што яна працягвае працаваць у Расійскай Федэрацыі.
Як паведамляе сайт ведамства, уладальнік AliExpress дае свае платформы для продажу тавараў з вывезенай з акупаваных тэрыторый Украіны медзі.
"На тэрыторыі Расіі найбольшы распаўсюд атрымала платформа анлайн-камерцыі AliExpress, якой кіруе даччыная расійская кампанія з групы Alibaba. Уладальнікам "Алібаба.КОМ" з'яўляецца зарэгістраваная ў Сінгапуры кампанія Aliexpress Russia Holding Private Ltd. Станам на 2023 год кампанія працягвае весці справы ў Расіі, падаючы міжнародную пляцоўку для продажаў замежных тавараў”, — гаворыцца ў паведамленні.
У той жа час, як адзначылі ў ведамстве, у красавіку 2023 года агенцтва Reuters паведаміла, што кітайская кампанія Quzhou Nova закупляла як мінімум 3220 тон меднага сплаву на агульную суму $ 7,4 млн у Дэбальцаўскага завода металургічнага машынабудавання, які кантралюецца Расіяй, у перыяд з 8 кастрычніка 2022 года да 24 сакавіка 2023 года.
Паводле звестак мытні, адгрузкі меднага сплаву з завода ішлі праз порт Наварасійска. З вывезенай з акупаваных тэрыторый медзі кампанія вырабляе тавары, якія прадае на платформах Alibaba.
