Столін на 11 дзён застанецца без гарачай вады

Жыхароў Століна папярэдзілі, што 11 дзён — з 17 па 28 ліпеня — яны будуць жыць без гарачай вады. Так, камунальнікі плануюць адключыць ад гарачага водазабеспячэння цэлы горад.

У распараджэнні за подпісам першага намесніка старшыні Столінскага райвыканкама — начальніка ўпраўлення па сельскай гаспадарцы і харчаванні Васіля Літвінкевіча ўказаная стандартная прычына адключэння — "правядзенне прафілактычных рамонтаў і гідраўлічных выпрабаванняў трубаправодаў цеплавой сеткі".

Улетку гарачую ваду — "для прафілактыкі" — адключаюць практычна ва ўсіх населеных пунктах Беларусі, дзе ёсць яе цэнтралізаваная падача. Звычайна гэты перыяд доўжыцца два тыдні — і стварае нязручнасці жыхарам. Каб памыцца, ваду даводзіцца награваць у рондалях. Або ўсталёўваць бойлеры.

У заходніх краінах, якія мяжуюць з Беларуссю, такой "традыцыі" няма — гарачая вада цячэ з кранаў увесь год, без перапынкаў на летнюю "прафілактыку".