Стала вядома, што адвакат Аляксей Бародка знаходзіцца ў СІЗА № 1
Аляксей Бародка / СТБ
Адвакат Аляксей Бародка знаходзіцца ў СІЗА № 1 на Валадарскага ў Мінску, піша @viasna96. Яго затрымалі яшчэ ў канцы студзеня, але праваабаронцы даведаліся пра гэта толькі праз тры месяцы. У чым Бародку абвінавачваюць, невядома.
21 красавіка Аляксея Бародку пазбавілі ліцэнзіі адваката.
У Беларусі з 2020-га праводзяць "зачыстку" адвакатаў. За гэты час ліцэнзій былі пазбаўленыя некалькі дзясяткаў чалавек — пераважна тыя, хто абараняў "палітычных". Некаторых адвакатаў асудзілі па крымінальных артыкулах. У красавіку сёлета адвакату Аляксандру Данілевічу прысудзілі 10 гадоў калоніі.
