Вы тут

Снапкоў: Беларусь і РФ гатовыя прыступіць да стварэння адзінага рынку газу

Мікалай Снапкоў у эфіры тэлеканала "Беларусь 1" / Скрыншот

Беларусь і Расія гатовыя пачынаць стварэнне агульнага рынку газу і для гэтага ўжо падрыхтавалі дарожную карту.

Пра гэта паведаміў першы намеснік прэм'ер-міністра Беларусі Мікалай Снапкоў у эфіры тэлеканала "Беларусь 1".

Дарожная карта неабходная для таго, каб ў 2022 годзе вызначыць "адназначныя, зразумелыя абодвум бакам прынцыпы і падыходы да функцыянавання аб'яднанага рынку газу", растлумачыў Снапкоў.

Пры гэтым бакі могуць усталяваць формулу разліку цаны на газ, каб у Беларусі захоўвалася "найбольш камфортная цана".

У гэтым годзе цана на газ для Беларусі складае 128,5 долара за 1 тысячу кубаметраў. Ва ўрадзе мяркуюць, што гэтая цана лепшая ў СНД і нават у ЕС.

Усе 28 саюзныя праграмы зараз ўзгодненыя. Першы віцэ-прэм'ер выказаў надзею на тое, што Аляксандр Лукашэнка і Уладзімір Пуцін падчас сустрэчы 9 верасня ацэняць, гатовыя карты да падпісання ці не.

Як паведамляла раней "Еўрарадыё", 31 жніўня пасол Беларусі ў Расіі Уладзімір Сямашка паведаміў аб тым, што з 28 дарожных карт застаецца няўзгодненай карта па стварэнні адзінага рынку газу. Прычынай гэтага Сямашка назваў розныя падыходы бакоў да механізму ўтварэння цаны на газ.

Каб сачыць за галоўнымі навінамі, падпішыцеся на канал Еўрарадыё ў Telegram.

Мы штодня публікуем відэа пра жыццё ў Беларусі на Youtube-канале. Падпісацца можна тут.