Службовых асобаў фірменнай крамы ў Мінску падазраюць у крадзяжы 224 млн

У Мінску распачалі крымінальную справу аб крадзяжы са спецыялізаванай крамы аднаго з вытворчых прадпрыемстваў грашовых сродкаў 224 мільёнаў рублёў. Артыкул — "крадзеж шляхам злоўжывання службовымі паўнамоцтвамі".

Як інфармуе прэс-служба Следчага камітэта, буйная нястача была выяўленая падчас рэвізіі. У выніку праверкі стала вядома, што да знікнення грашовых сродкаў могуць мець дачыненне 34-гадовая загадчыца крамы і яе намеснік. Следчыя дзеянні і аператыўна-вышуковыя мерапрыемствы гэта пацвердзілі.

Высветлілася, што загадчыца давала ўказанні падначаленым работнікам частку выручкі ад рэалізацыі насельніцтву мотаблокаў і міні-трактароў не праводзіць праз касу, а аддаваць ёй. Грошы жанчына выкарыстоўвала ў асабістых мэтах. Хаваючы нястачу, напярэдадні рэвізій яна брала ў банках крэдыты, затым вяртала фінансавым установам пазычаныя сродкі. Праваахоўнікі выявілі схему крадзяжоў, а таксама ўстанавілі, што некалькі разоў у незаконных аперацыях удзельнічала і намеснік загадчыцы.

Жанчыны прызналі сваю віну і цалкам кампенсавалі нанесеныя прадпрыемству страты.

Фота: Мінск-навіны