Сабаленка і Мертэнс выйшлі ў фінал парнага разраду турніру ў Маямі

Беларуска Арына Сабаленка і бельгійка Элізе Мертэнс выйшлі ў фінал парнага разраду тэніснага турніру ў Маямі. У паўфінальным матчы яны выбілі беларуска-аўстралійскі тандэм Вікторыя Азаранка / Эшлі Барці — 7:6 (8:6), 7:5.

Арына Сабаленка выступала ў адзіночным разрадзе турніру і ў другім коле саступіла прадстаўніцы Аўстраліі Айле Тамлянавіч. Вікторыя Азаранка таксама выбыла з адзіночнага разраду ў другім коле, прайграўшы Каралін Гарсія (Францыя).

Эшлі Барці, з якой Азаранка выступала ў парным разрадзе, дайшла да фіналу адзіночных спаборніцтваў і згуляе там з чэшкай Каралінай Плішкавай.

Сабаленка і Мертэнс пасля перамогі ў паўфінале выканалі на корце танец.