Рэжым "контртэрарыстычнай аперацыі" на мяжы з Украінай аказаўся вучэннямі
КДБ ладзіць вучэнні / Sputnik
Еўрарадыё датэлефанавалася ў выканкам Лельчыцкага раёна, дзе КДБ Беларусі раніцай 15 лютага раптам увёў рэжым "контртэрарыстычнай аперацыі". Там нам расказалі, што хвалявацца праз гэтую навіну не варта — сілавікі ладзяць вучэнні, і гэта ўжо не ўпершыню.
— Яны [КДБ. — Еўрарадыё] праводзяць сваю працу. Усё астатняе ў нас у штатным рэжыме. І пра сірэны пісалі ў сацсетках, каб людзі не палохаліся. Яны правяраюць гатоўнасць сваіх структурных падраздзяленняў.
Супрацоўніца райвыканкама расказала, што загадзя сілавікі нікога не апавяшчалі. Пра рэжым "контртэрарыстычнай аперацыі" ў раённай адміністрацыі даведаліся толькі раніцай 15 лютага.
— Не хвалюйцеся, калі ласка, у нас усё ў штатным рэжыме, — дадала яна.
