Zorge назвалі беларусаў "самай крыважэрнай нацыяй" і выйшлі на 2 бісы

130128_ma6a_zorge_0.mp3

Еўрарадыё ў поўным складзе закахалася ў гурт Zorge падчас інтэрв’ю з Яўгенам Фёдаравым. Ён тады паставіў беларусам дасціпны дыягназ — “дэпрэсію па той бок Cкайпа”. Высветлілася, што закаханых ў Zorge беларусаў шмат. Прычым,яны прыехалі на канцэрт з усіх куткоў нашай невялікай краіны.

“Яны чарговы раз прымусілі дакрануцца да чароўнага, — не хавае эмоцый лідар гарадзенскага гурта “Любимая вредная привычка” Яўген Нікіцін. — Часцей бы яны прыязджалі сюды, таму што вельмі бедна, вельмі бедна менавіта на такія эмоцыі — эмоцыі шчырыя, станоўчыя, якія дапамагаюць далей рухацца і жыць”.

Яўген Нікіцін

Zorge былі ў Мінску ўпершыню. Хваляваліся. Але дарма. Новыя песні Фёдарава&Co спявала добрая палова залы. Мінскі канцэрт дапамог зразумець істотнае многім прыхільнікам Tequilajazzz — папярэдняга гурта Яўгена Фёдарава.

“Гэта тая ж ідэя, але ў іншай плоскасці, — тлумачыць адрозненне паміж “Тэкілай” і Zorge Яўген Нікіцін. — У маім асабістым знаёмстве з Tequilajazzz ужо ўсё было зразумела. А з Zorge было зразумела яшчэ не да канца. А цяпер усе кропкі расставіліся над “і” — гэта шыкоўны гурт!”

Zorge пачалі з новага. Яны падаваліся камянямі, якія не могуць зрушыць стагоддзі. Яны скаралі з кожнай незнаёмай нотай і сцвярджалі ў любімых мелодыях. Музыкі здолелі падпарадкаваць сабе нават акустыку клуба Re:Public. Яны цудоўна адстроілі для сябе гук.

“Ніколі не быў прыхільнікам Tequilajazzz — я не сачыў за гэтым гуртом, і гурт Zorge я ніколі не чуў раней, — кажа Аляксей Кутузаў ці DJ I.F.U., які радасна пратанчыў увесь канцэрт. — Мяне сюды прыцягнулі сябры, і я вельмі гэтаму рады, таму што я шчыра афігеў! Zorge апынуліся вельмі крутымі, і з унікальным матэрыялам! Факт! Мне вельмі спадабалася, і гэта адзін з маіх улюбёных расійскіх гуртоў на дадзены момант. Я зразумеў сёння ўжо, хаця я рускія гурты не надта і люблю”.

DJ I.F.U.

На канцэрт Zorge прыйшла добрая частка мінскага бамонду. Алесь Плотка апынуўся ярым прыхільнікам гурта

Уладзімір Казлоў з гурта Re1ikt


Натуральна, мы чакалі, калі Фёдараў пачне гаварыць. Прычым,скажа нешта такое, што падтрымае добрым словам беларускую “дэпрэсію па той бок Скайпа”. Але ён маўчаў. Казаў “дзякуй” і напаўняў нашы вены, падавалася, самай правільнай музыкай у свеце.

“Гурт мяне весяліць ужо шмат-шмат гадоў, пачынаючы з таго, як ён быў Tequilajazzz, граў хэві-метал, вельмі сур’ёзны хэві-метал, потым стаў лягчэць, але пакідаў свой цудоўны саўнд, сваю мелодыку, — распавядае даўнішняя прыхільніца гурта Юля. — І, нягледзячы на тое, што яны змяняюць назвы — вось, цяпер Zorge — гэта яны і ёсць, і гэта выдатна!”

 

А потым здарыўся першы “біс”, і Фёдараў сказаў, што хваляваўся і нават не спаў ноч. І надзея на тое, што мінскі канцэрт пройдзе на “ура” з’явілася толькі пасля самалёту, калі музыкаў павезлі ў рэстаран. Zorge адыгралі тры песні. І сышлі. І зноў усе крычалі: “Zorge”, і зноў Zorge выйшлі. З гэтай нагоды Фёдараў паставіў нам яшчэ адзін дыягназ “самай крыважэрнай нацыі” і зацягнуў “Зимнее солнце”.

“Мы павесяліліся і засумавалі, таму што гэта старая школа, таму што з гэтага ўсё пачыналася, — падвёў рысу пад пачутым бас-гітарыст IQ48 Улад Плюшчаў. — Насамрэч, яны прасунулі беларускую музыку ў еўрапейскія межы — шматлікія беларускія музыкі былі іхнімі прыхільнікамі. Гурт унікальны, ён паўплываў на многія беларускія гурты”.

Яўген Бузоўскі і Ўлад Плюшчаў

 

На апошніх хвілінах “Зимнего солнца” у залу ўварваўся гурт Drum Ecstasy поўным складам. Хацелі пачуць Zorge, а пачулі “Зимнее солнце”. Ну і правільна. Zorge — гэта працяг Tequilajazzz. Tequilajazzz памаладзелы. Вось так.

Пасля выступу Фёдараў доўга размаўляў з прыхільнікамі, раздаваў аўтографы і сваё святло мінчукам

 

Усе фотаздымкі з канцэрта глядзі тут

Апошнія навіны

Галоўнае

Выбар рэдакцыі