Затрыманні за Плошчу ў Мінску працягваюцца
Супрацоўнікі міліцыі ў цывільным затрымалі Аляксандра Жукава ў сувязі са "справай 19 снежня". Пра гэта Еўрарадыё распавялі калегі Аляксандра.
Трое супрацоўнікаў забралі Жукава на машыне з працы і адвезлі ў галоўнае ўпраўленне УБАЗ (упраўленне па барацьбе з арганізаванай злачыннасцю). Пра гэта ён паспеў паведаміць сябрам па тэлефоне.
Аляксандр Жукаў сапраўды быў 19 снежня на Кастрычніцкай плошчы. Але калі адбываліся асноўныя падзеі ля Дома ўрада, ён з сябрамі ўжо сядзеў у кавярні "Пінта" на вуліцы Берсана, патлумачыла сяброўка Аляксандра.
Міліцыянты тэлефанавалі Жукаву ужо даўно, спрабавалі даведацца адрас агонай працы. Але ён прасіў даслаць позву на адрас рэгістрацыі. 28 сакавіка міліцыянты пазванілі да яго на працу ў аддзел кадраў, а сёння ўжо прыехалі па яго на працу.
