Палова малака ў мінскіх крамах — з парашку

111220 Nasta Malako.mp3

Раніцай у краме "Белая Русь" — толькі адзін від малака, "Славянскія традыцыі" тлустасцю 3,6%.

На першы погляд — нічога дзіўнага, але ўважліва прачытаўшы склад на адваротным баку, заўважаеш, што малако — “адноўленае”. Што гэта значыць?

"Малако адноўленае — гэта і ёсць малако з сухога малака", — тлумачыць Еўрарадыё загадчыца лабараторыі тэхналогій натуральнамалочных прадуктаў Інстытута мяса-малочнай прамысловасці Алена Яфімава.

Зімой звычайна прадаецца ўсё больш малака, якое робяць з сухога.

У краме "Радзівілаўскі" палова малака — адноўленае, што значыць — зроблена з сухога. Праўда, даведаешся пра гэта, толькі прачытаўшы склад дробнымі літарамі на адваротным баку!

Еўрарадыё высветліла, ці можна называць малаком тое, што зроблена з парашку.

“Паводле нашага заканадаўства пакуль можа называцца “малако”, — кажа загадчыца аддзела стандартызацыі Інстытута мяса-малочнай прамысловасці Ала Ахраменка. Але гэта павінна быць пазначана ў самім найменні. — “Калі гэта робіцца з адноўленага малака, то павінна быць у найменні напісана “малако пітное з адноўленага малака”.

Заўважым: у найменні (!), а не ў складзе.

Цікава, што згодна з расійскімі стандартамі, малако, якое робяць з сухога — “малочны напой”, а не "малако". "Мы не падтрымліваем тэрмін "адноўленае малако", паколькі спажывец не зразумее, што гэта абазначае", — супраць тэрміна "адноўленае малако" выступілі вытворцы гэтага прадукта.

Такім чынам, наша малако, якое ідзе за мяжу, павінна быць ужо ў іншай упакоўцы.

Алена Яфімава — "малочнік" з 32-гадовым стажам. Яна кажа, што не чытае найменне: галоўнае — склад.

Алена Яфімава: “І сухое малако, і адноўленае… для мяне гэта малако. Мне ўсё роўна, я ведаю, што там нічога дрэннага няма. У сухім малацэ проста менш мікраарганізмаў… Асабіста я п’ю і тое, і іншае. Я не чую розніцы, таму мне ўсё роўна. Для мяне гэта ўсё малако, бо мы прывезлі малако, згусцілі і высушылі. Проста прыбралі ваду, а пасля ізноў дадалі”.

Еўрарадыё: А ці не падманваюць спажыўца, калі вялікімі літарамі пішуць, што гэта малако і толькі на адваротным баку, дробным шрыфтам, — што яно, аказваецца, адноўленае?

Алена Яфімава: “Гэта пытанне тэрміналогіі. Мне, напрыклад, ўсё адно, што там напісана, як яно называецца — "малако" ці "малочны напой": я як харчавік буду глядзець, з чаго складаецца…”

Супрацоўніца Інстытута мяса-малочнай прамысловасці раіць гэта рабіць з усімі прадуктамі, а не толькі малаком.