Непаўналетнюю “рэвалюцыянерку” напужалі штрафам і турмой
17-гадовая жыхарка Магілёву Анастасія Валавікова адмовілася ад “маўклівых акцый” пасля таго, як міліцыянты правялі з ёй прафілактычную размову.
24 чэрвеня ў пятніцу да яе дадому прыйшлі два ўчастковых міліцыянты — Сяргей Палавінскі ды Іван Мудроў. З імі таксама быў нехта Аляксандр Смірноў. Ён прадставіўся “супрацоўнікам аблвыканкама па справах непаўналетніх”. З дзяўчынай і яе маці правялі размову, перадае БелаПАН.
Анастасіі сказалі, што калі яна не адмовіцца ад “маўклівых акцый”, то ў яе будуць праблемы з паступленнем. Візіцёры паказалі ёй запісы з сеткі Вконтакте і сказалі, што супраць дзяўчыны могуць быць тры артыкулы — арганізацыя масавых беспарадкаў, распаўсюд улётак ды ўдзел у масавых беспарадках. Па словах супрацоўнікаў міліцыі, Анастасію могуць аштрафаваць ці на тры гады пазбавіць волі.
Пасля гэтага дзяўчына сказала, што хадзіць на “маўклівыя акцыі” не будзе.
