На Пікнік.by выставяць лепшыя фотапрацы апошніх трох гадоў (Відэа)

Падчас фестывалю "Пікнік.by" будзе адкрытая экспазіцыя незалежнага конкурсу Belarus Press Photo. Для яе адбяруць самыя цікавыя, пазітыўныя ды прыгожыя працы ў галіне дакументальнай фатаграфіі за 2010 - 2012 гады. Яшчэ адной немузычнай забавай оўпэн-эйра стане кальян-зона, якую днямі пагадзілася арганізаваць "Кальянная №1". На тэрыторыі фэсту будзе каля 20 кальянаў з шырокім асартыментам. А аматарам больш "здаровых" забаў арганізатары "пікніка"прапануюць фізічныя практыкаванні.

"Ёга пачнецца як і само мерапрыемства дзесьці а 14-й гадзіне, - распавядае прадзюсар фэсту Аксана Маторына. - Трэба каб людзі адышлі ад доўгага працоўнага тыдня, субота ж будзе працоўнай. Нам абяцаюць знакамітага майстра з Масквы, але пакуль яго імя трымаюць у сакрэце. Ёга будзе працягвацца дзесьці гадзінкі тры, таму, калі ёсць дыванкі для ёгі, то раю іх захапіць з сабой".

Квіткі на "Пікнік.by" можна набыць у клубе "Графіці" ці ў касах сістэмы Ticketpro. Каштуюць яны 110 000 тысяч у клубе і 120 – у распаўсюднікаў. Разам з білетам на фэст пакупнік атрымлівае 50% зніжку на наведванне сталічнай "Кинокомнаты" - месца для сумеснага прагляду фільмаў на вялікім экране ва ўтульнай кампаніі. Дарэчы, менавіта "Кинокомната" арганізуе на фэсце невялікі кінатэатр, дзе ўвечары будзе транслявацца фінал еўракубка.

Пікнік.by:

Першая сцэна (14:00 - 23:00):
"Серебряная свадьба", "Разбiтае Сэрца Пацана", "Кассиопея", Chiefs Band, Botanic Project, Akute, The UNB, "Черчилль" (RockerJoker), "Красные Звезды", , Monkey Bite. Вядучыя на сцэне Каця Пытлева ды Ілля Маліноўскі.

Другая сцэна (14:00 - 02:00):
Pomidor/OFF, HandMadE, Паліна Рэспубліка, Анастасія Шпакоўская, "Гаротніца", Guda, Pawa, "Людзі на балоце", "Нагуаль", "Князь Мышкін", праект "Танцы з Бубнам", Diamos Roll&Руся. А таксама паэты Віталь Рыжкоў, Кацярына Зыкава, Антон Рудак, Андрэй Адамовіч, Уладзь Лянкевіч, Ася Волкава, Марыйка Мартысевіч, Андрэй Хадановіч. Вядучы Алег Хаменка.

На розных зонах фэстывалю:
Дыджэі SheJay Ksana, Andy Roc, Карамыслаў, Papa BO, Ежака (Каця Пытлева), Stereobeaver (Вільня).

Разнастайныя забавы: фрысбі, капаэйра, сокс, бодзі-арт, выставы, кінатэатр пад адкрытым небам, настольныя і спартовыя гульні, ёга ды іншае.

Праезд:
Арганізатары раяць дабірацца на ўласным транспарце (будзе вялікая паркоўка). Каардынаты для GPS-навігатара: +54° 14' 18.04", +26° 25' 46.14"

Як ехаць з Мінска на аўто:
Месца прызначэння: вёска Малое Запруддзе, Валожынскі раён, Мінская вобласць. Тэрытарыяльна на вялікай мапе трэба знайсці чыгуначную станцыю "Валожын" і ад яе ў трох км. на поўнач будзе знаходзіцца гэты населены пункт. На больш дробных мапах можна знайсьці суседні населенны пункт – Лоск. Агульная працягласць маршрута ад Мінска да хутара Шаблі – 100 км. роўна. Цягам усяго шляху працуе мабільная сувязь асноўных аператараў.

Важна ведаць: Чыгуначная станцыя "Валожын" знаходзіцца ў 17 км. на поўнач ад горада Валожын!

Запраўкі: адразу на выездзе на гарадзенскую трасу; праз 27 км., у Валожыне (+газ).

Праезд па кроках:

1.    Выезд з Мінска на гродзенскую трасу (Е28)
2.    Праз 56 км. – пост узважвання фур, за ім – падзел дарогі. Гродзенская сыходзіць пад аўтамабільны мост лявей, вам – направа, перад мостам, па ўказальніку на Ашмяны, Вільню.
3.    Па віленскай трасе 23 км. па галоўнай, да аўтамабільнага моста над галавой. Перад мостам направа па ўказальніку "ст. Валожын".
4.    Ад моста ехаць прыблізна 5 км. па галоўнай да населенага пункту Гародзькі.
5.    Па ўездзе ў Гародзькі на скрыжаванні ў выглядзе "Т" налева на знак "Лоск — 7км"
6.    Па галоўнай, па асфальце. Праз 500 м. каля царквы направа, да чыгуначнага пераезда, які будзе яшчэ праз 300 м.
7.    Пасля чыгуначнага пераезду праз 1 км. на правым баку глядзець на маленькі белы ўказальнік Запруддзе.
8.    За ўказальнікам павярнуць направа, на ўнутраную асфальтавую дарогу, што ідзе па вёсцы. Арыентавацца пры руху на часовыя пазнакі, якія будуць указваць кірунак да паркоўкі фэсту.
9.    Важна! Для правільнага размяшчэння машын, паведаміце, калі ласка, ахове прыблізны час свайго прыезду.