Марына Коктыш стала лаўрэаткай прэміі фонда Цайт
Журналістка ўжо атрымала запрашэнне на ўрачыстую цырымонію ўручэння 15 чэрвеня ў Нобелеўскім інстытуце ў Осла.
Намесніца галоўнага рэдактара газеты "Народная воля" стала лаўрэаткай міжнароднай прэміі імя Герда Буцэрыуса "Маладая прэса Усходняй Еўропы — 2009" (прэміі фонда Цайт), паведамляе прэс-служба БАЖ.
Сама Коктыш кажа, што ў сённяшняй няпростай сітуацыі са СМІ, калі недзяржаўныя газеты апынуліся на мяжы закрыцця, гэтая прэмія — знак увагі і падтрымкі з боку еўрапейскіх калег.
Прэмія "Маладая прэса Усходняй Еўропы" была заснаваная ў 1999 годзе нямецкім фондам "Zeit". У папярэднія гады прэмію Цайта з беларускіх СМІ атрымлівалі: "Борисовские новости", "Новы час", "Газета Слонімская", "Ежедневник", інфармагенцтва БелаПАН, "Белорусская деловая газета", "Салідарнасць", "Белорусский рынок", "Народная воля", "Свободные новости", "Наша Ніва", "Брестский курьер", "Витебский курьер-М", "Intex-press", "CDmag", Святлана Калінкіна, Мікола Маркевіч, Ася Трацюк.
