Макей і Шварцэнберг гаварылі пра беларускіх палітвязняў
Кіраўнік МЗС Беларусі Уладзімір Макей нядаўна размаўляў па тэлефоне з міністрам замежных спраў Чэхіі Карэлам Шварцэнбергам.
Паводле МЗС Беларусі, Макей і Шварцэнберг, між іншым, абмеркавалі адносіны Беларусі і Еўрасаюза ды тое, якім чынам іх можна было б нармалізаваць. Як паведамляе прэс-служба чэшскага МЗС, міністры абмяркоўвалі тэму палітзняволеных.
БелаПАН нагадвае, што размова кіраўнікоў знешнепалітычных ведамстваў адбылася 17 снежня з нагоды 20-годдзя ўстанаўлення дыпламатычных адносінаў паміж Беларуссю і Чэхіяй.
Варта адзначыць, што размова Уладзіміра Макея з Карэлам Шварцэнбергам супала па часе з візітам у Мінск дырэктара дэпартамента Расіі, Усходняга партнёрства, Цэнтральнай Азіі, рэгіянальнага супрацоўніцтва і АБСЕ Еўрапейскай службы знешніх дзеянняў Гунара Віганда. Паводле звестак прэс-службы беларускага МЗС, 17 снежня еўрачыноўнік сустрэўся з Уладзімірам Макеем, "бакі абмеркавалі комплекс пытанняў, што тычацца няўнага стану адносінаў паміж Беларуссю і ЕС і шляхоў іх нармалізацыі".
Фота — bymedia.net
