Лябедзька: Сустрэчы даводзіцца праводзіць у атачэнні "сілавікоў"
Лідэр Аб'яднанай грамадзянскай партыі заявіў, што за ім сочаць супрацоўнікі спецслужбаў.
Сочку за сабой заўважыў старшыня Аб'яднанай грамадзянскай партыі Анатоль Лябедзька. Як распавёў палітык Еўрарадыё, яна праводзіцца непрафесійна і, магчыма, гэта зроблена адмыслова.
Анатоль Лябедзька: “Літаральна ўчора праз тэлефон мы дамовіліся сустрэцца з Віктарам Карніенкам. Натуральна, што яна адбылася ў атачэнні і з "антуражам" прадстаўнікоў сілавых структур. Вядзецца гэта ўсё дастаткова грубавата, непрафесійна, а можа і, наадварот, гэта такая "адкрытасць", каб паслаць яснае пасланне, што на мяне ёсць крымінальная справа, што я хаджу пад крымінальным пераследам”.
Лябедзька адзначыў, што разглядае такія дзеянні як палітычны і псіхалагічны ціск на яго асобу. Аднак палітык не мае намеру звяртацца ў праваахоўныя органы з запытам на прадмет законнасці правядзення аператыўна-вышуковых мерапрыемстваў у дачыненні да сябе.
