Кантралёр: Людзі б’юцца аднолькава і за 7 тысяч рублёў, і за 7 долараў!

Святлана Барысаўна працуе кантралёрам грамадскага транспарту больш за шэсць гадоў. Кажа, што раней аштрафаваць чалавека было вельмі цяжка. Але і штраф тады быў большы за сем… долараў (цяпер гэта было б 56 тысяч рублёў!). Самая вялікая сума за ўсю гісторыю.

“З самага пачатку, калі я прыйшла, штраф быў 0,5 базавай. Максімальная сума за ўвесь час — 15 з паловай тысяч. Тады аштрафаваць чалавека было вельмі праблемна. Калі штраф перавялі на 0,2 базавыя велічыні, то некаторыя людзі насілі гэтыя 7 тысяч асобна ў кашалёчку. Для іх было лягчэй заплаціць 7 тысяч і спакойна паехаць сабе далей”, — узгадвае кантралёр.

Але да добрага прывыкаеш хутка, — кажа кантралёр. Неўзабаве пачаліся “баі” і за 7-тысячны штраф!

Святлана: “…пасля людзі прывыклі. Слова “штраф” іх па-ранейшаму раздражняла, як і сёння. Людзі пачалі ўпірацца неверагодна”.

Што праўда, апошнія месяцы безбілетнікі прасцей развітваліся з 7 тысячамі. Асабліва моладзь — маглі адразу адкрыць кашалёк і дастаць штраф.

Святлана: “За апошнія паўгода людзі сапраўды сталі спакайней аддаваць гэтыя 7 тысяч, асабліва пасля верасня, калі ў грамадстве гэта здарылася…”.

Нагадаю, што да нядаўняга часу штраф за безбілетны праезд складаў 7 тысяч — гэта менш за долар!

Ужо трэці дзень, як базавая велічыня павялічылася з 35 да 100 тысяч. Разам з ёй павялічыўся і штраф за безбілетны праезд. Цяпер замест 7 тысяч безбілетнік мусіць заплаціць ажно 20 тысяч! Ці стане ад гэтага менш “зайцоў”, пакуль сказаць цяжка…

Але нават палепшаная паслявераснёўская статыстыка выглядае сумна.

Святлана: “У апошні час з 10 чалавек — два маглі даць грошы адразу ж або спытаць папярэдне: колькі я вам вінен? Астатнія ўсё адно, нават за мізэрныя штрафы біліся”.

Прычым біліся ў прамым сэнсе, скардзіцца кантралёр і паказвае палец са шнарамі. Кажа, што пакусаў безбілетнік. Прычыны ж ва ўсіх розныя — “я заўсёды езджу на праязным, але сёння забыўся”, “я не паспеў”, “у мяне цяжкія сумкі”, “ну а што, калі я праеду 1-2 прыпынкі”… і г.д.