Гурт "9 мм" выдае "Слова правды"
Разам з дэбютным дыскам музыкі прэзентуюць і кліп на загалоўную песню.
Гурт "9 мм" скончыў працу над дэбютным альбомам "Слова правды". На дыску будзе 11 рускамоўных трэкаў, стыль якіх самі музыкі характарызуюць, як інтэлігентны панк.
"16 траўня ў Rocker Bar будзе прэзентацыя альбома і там жа мы прэзентуем яшчэ і першы кліп, які акурат зараз даздымаем, - распавядае трубач гурта Міхась Есьман. - Кліп на загалоўную песню. Пра сюжэт я не ведаю, як расказаць. Ён пра словы праўды, пра людзей, якія даведваюцца пра сябе праўду і выходзяць з сябе".
Над кліпам працуе рэжысёр Міця Сямёнаў, які раней здымаў відэа для гуртоў "Или-Или" ды beZ bileta. Падчас прэзентацыі музыкі паспрабуюць паэксперыментаваць з гучаннем. Для гэтага запрошаны саўндпрадзюсар дэбютніка гурта Валеры Кандрацьеў, які дадасць у песні "9 мм" розных электронных гукаў. Плануецца, што днямі дыск з'явіцца ў продажы. Набыць яго можна будзе і на канцэрце 16 траўня. Цалкам магчыма, што пазней "Слова правды" з'явяцца ў вольным доступе на афіцыйным сайце гурта 9mm.by.
