Ашчадбанк працягнуў мільярдны крэдыт Беларусі яшчэ на тры гады
Гэты крэдыт расійскі банк выдаў "Беларуськалію" ў лістападзе 2011 года. Ён быў разлічаны на 1 год.
Пра гэта паведамляе сайт расійскага банка. Як нагадвае Lenta.ru, Ашчадбанк выдаў "Беларуськалію" мільярд долараў пад заклад акцый нафтаперапрацоўчага заводу "Нафтан". Аднак грошы пайшлі не на фінансаванне дзейнасці "Беларуськалія", а ў золатавалютныя рэзервы Беларусі. Гэта было звязана з фінансавым крызісам, які разгарэўся летась.
У красавіку 2012 года з'явіліся звесткі, што "Беларуськалій" хоча датэрмінова пагасіць крэдыт ад Ашчадбанка. Аднак бліжэй да восені выявілася, што кампанія, наадварот, просіць пра адтэрміноўку. У верасні кіраўнік Ашчадбанка Герман Грэф заяўляў, што ўзначалены ім банк гатовы задаволіць гэтую просьбу. Пры гэтым Грэф таксама заявіў, што Ашчадбанк зацікаўлены ў інвестыцыях у калійныя радовішчы ў Беларусі.