Распачалі справу ў адносінах дырэктара мінскага камбіната хлебапрадуктаў
Яго падазраюць у выкарыстанні службовых паўнамоцтваў у карыслівых мэтах.
У адносінах дырэктара мінскага камбіната хлебапрадуктаў распачалі крымінальную справу. Яго падазраюць у службовых злоўжываннях. Супрацоўнікі Партызанскага РУУС сталіцы высветлілі, што кіраўнік на працягу трох гадоў выкарыстоўваў магчымасці прадпрыемства для асабістых патрэбаў.
Як інфармуе прэс-служба мінскай міліцыі, дырэктар вёў будаўніцтва на ўласным участку, рамантаваў кватэру дачкі, добраўпарадкаваў месца пахавання маці. Для гэтага ён выкарыстоўваў рабочых прадпрыемства, інструменты і транспарт. Крымінальная справа распачатая па артыкуле "злоўжыванне ўладай і службовымі паўнамоцтвамі". Дырэктару пагражае да шасці гадоў пазбаўлення волі.
"Интерфакс-Запад" дадае, што матэрыяльныя страты ад дзейнасці дырэктара камбіната хлебапрадуктаў склалі больш за 70 мільёнаў рублёў.
Фота: guvd.gov.by