Расія вярбуе на вайну мігрантаў, якія штурмавалі мяжу ЕС — #ІхНоравы

12/12/2023 - 13:18

#ІхНоравы / @rubanau_collage

Святлана Ціханоўская ўжо павіншавала новага прэм'ера Польшчы Дональда Туска. А не чытала б сусветных навін — і не павіншавала б.

Мы таксама лічым, што важна сачыць не толькі за падзеямі ў Беларусі, але і за тым, чым жыве свет. І штодня расказваем вам пра гэта.

“Гэта будзе проста і добра”

Расія спрабуе вербаваць мігрантаў, якія штурмавалі мяжу з Фінляндыяй, і адпраўляць іх на фронт, піша ВВС.

Журналісты ведаюць пра некалькі выпадкаў, калі замежнікаў адпраўлялі ў вайсковы лагер на мяжы з Украінай усяго праз некалькі дзён пасля таго, як затрымлівалі на тэрыторыі РФ за парушэнне міграцыйнага заканадаўства.

ВВС мяркуе, што ў ізалятарах, дзе мігрантаў утрымліваюць перад дэпартацыяй, іх прымушаюць падпісваць кантракты і прымаюць на службу ў расійскае войска. Журналісты расказваюць гісторыю аднаго з такіх мігрантаў.

Авад (імя змененае) прыехаў з Самалі яшчэ летам. Спярша ён паспрабаваў трапіць у Польшчу ў абыход звычайных працэдур — праз Беларусь. На гэта пайшлі месяцы. А потым паспрабаваў трапіць у ЕС ужо праз расійска-фінскую мяжу, дзе гэтай восенню выбухнуў міграцыйны крызіс паводле беларускага ўзору.

Фіны даволі хутка закрылі ўсе восем пунктаў пропуску на мяжы з РФ. І ў сярэдзіне лістапада расійская паліцыя пачала арыштоўваць мігрантаў, у якіх скончыліся кароткатэрміновыя расійскія візы.

Сам Авад так і не здолеў трапіць у Фінляндыю. Яго віза скончылася яшчэ ў жніўні, а ў сярэдзіне лістапада яго арыштавалі і далі штраф — 20 еўра. Штраф — не найгоршае, што можа здарыцца з мігрантам. Авад баяўся дэпартацыі ў Самалі. Як ён кажа, там яго жыццю некалькі разоў пагражалі баевікі "Аш-Шабаб".

І пакуль Авад пад вартай чакаў дэпартацыі з Расіі, да яго і мінімум дзесяці іншых зняволеных мігрантаў звярнуліся вайсковыя прадстаўнікі. Яны прапанавалі "працу на дзяржаву". Мігрантам паабяцалі добрую зарплату, медыцынскае абслугоўванне і дазвол застацца ў Расіі пасля таго, як армейскі кантракт скончыцца.

"Мы спыталі [якая будзе праца], але нам сказалі, што гэта проста і добра", — кажа Авад.

Дакументы з прапановай працы былі на рускай мове — самаліец паняцця не меў, што ў іх напісана. Ён палічыў, што яму прапануюць працу, звязаную са службай унутры Расіі.

І падпісаў прапанову разам з іншымі мігрантамі. Іх пасадзілі ў аўтобус і павезлі на поўдзень. Так Авад даведаўся, што трапіць на вайну.

За што байкатуюць Zara?

У сацсетках скардзяцца на ZARA праз рэкламу “The Jacket”. На адным са здымкаў выяўленая мадэль, якая трымае ў руках загорнуты ў белы пластык манекен. Дзяўчына знятая на фоне патрэсканых камянёў і пабітых статуй.

Што ж абурыла сацсеткі? Людзі дапусцілі, што гэта адсылка да здымкаў, якія публікаваліся з сектара Газа ў першыя дні ізраільскіх бамбардзіровак.

Байкот для Zara

It's not fiction, it's real.#ZaraBoycott pic.twitter.com/YvUAjmUdjz
— اسكندرية - Alexandria (@Alexandria_egy1) December 10, 2023

Zara адмовілася ад каментароў. Але паводле звестак BBC, рэкламная кампанія была задумана ў ліпені і знятая ў верасні — то-бок да пачатку вайны паміж Ізраілем і сектарам Газа.

“Мы не падпішам сабе пасведчання пра смерць”

Лідары мноства краін сабраліся ў ААЭ, каб пагаварыць пра клімат, але так і не змаглі дамовіцца пра галоўнае. У праекце асноўнага пагаднення саміту COP28 няма закліку паэтапна адмаўляцца ад выкапнёвага паліва, піша CNN. А гэта, увогуле, правал саміту, бо менавіта выкапнёвым палівам і выкліканы кліматычны крызіс.

Выніковы дакумент саміту заклікае краіны прыняць меры па скарачэнні забруджання планеты, і гэтыя меры "маглі б" уключаць скарачэнне спажывання і здабычы нафты, вугалю і газу. Увогуле, фармулёўка даволі мяккая — і няма ніякіх тэрмінаў.

Эксперты пішуць, што мяккія фармулёўкі пра выкапнёвае паліва ў праекце пагаднення — гэта саступка краінам, што здабываюць нафту. Так, яшчэ раз нагадваем, саміт праходзіць у ААЭ, і месца правядзення з самага пачатку выклікала шэраг пытанняў — багатая на нафту краіна не ў першых шэрагах тых, каго турбуюць кліматычныя праблемы.

Але калі для кагосьці клімат — гэта "праблемы левакоў", то для іншых — літаральна жыццёва важнае пытанне. І Альянс малых астраўных дзяржаў ужо заявіў, што яго сябры не ўхваляць пагадненне ў цяперашнім выглядзе.

"Мы не будзем падпісваць нашае пасведчанне пра смерць", — заявіў палітык з астраўной дзяржавы Самоа Седрык Шустэр.

Абаронца клімату і былы віцэ-прэзідэнт ЗША Эл Гор лічыць, што яго пачулі. Вось толькі цяперашні праект пагаднення — гэта правал.

"Гэты ліслівы праект чытаецца так, быццам АПЕК прадыктавала яго слова ў слова", — піша Гор у Х.

У гэты праект выніковага пагаднення яшчэ могуць унесці змены. Прыхільнікі абароны клімату паспрабуюць зрабіць больш жорсткімі фармулёўкі, а нафтавыя краіны — яшчэ больш іх змякчыць.

Дваццацігадовыя баяцца пастарэць

Інфлюэнсерка Эма не перажывала праз старэнне, пакуль... ёй не споўнілася дваццаць гадоў.

"Я пачала вар'яцець, — кажа яна ў адным са сваіх відэа. — Я бачу, што выглядаю інакш, чым два гады таму... Як я буду выглядаць праз пяць гадоў?"

Пакаленне Z жудасна баіцца старэння, заўважае CNN. Гісторыі, у якіх яны апісваюць свае антыўроставыя практыкі, хутка становяцца віруснымі.

Паводле звестак аналітычнай кампаніі Circana, пакаленне Z выбірае касметыку з антыўзроставымі ўласцівасцямі. А 70 працэнтаў прадстаўнікоў гэтага юнага пакалення штодня выкарыстоўваюць антыўзроставыя сыроваткі.

Стартап па вытворчасці ботаксу Peachy заявіў, што пакаленне Z — яго самая хуткарослая аўдыторыя. Ну і нагадаем, што сёлета па TikTok разляцелася віруснае відэа з назвай: "Што я раблю, каб запаволіць працэс старэння ў 14-гадовым узросце".

Тая самая паштоўка

🎄 This year’s official Christmas card features a photograph of The King and Queen taken in the Throne Room at Buckingham Palace on Coronation Day by Hugo Burnand. pic.twitter.com/nTawKRUAFZ
— The Royal Family (@RoyalFamily) December 9, 2023