Расце колькасць пацярпелых ад ашуканскай схемы з аплатай "камуналкі"
Пасля выяўлення фішынгавай старонкі ў МУС просяць зрабіць скрыншот і патэлефанаваць у міліцыю / Ілюстрацыйнае фота pixabay.com
У Беларусі расце колькасць пацярпелых ад новай схемы махлярства, звязанай з аплатай "камуналкі". Пацярпелыя ёсць ва ўсіх рэгіёнах краіны, кажуць у МУС.
Праблемы ўзнікаюць у тых, хто спрабуе заплаціць за камунальныя паслугі не праз інтэрнэт-банкінг, а праз сайт банка. А на сайт трапляюць па рэкламнай спасылцы, якую бачаць у сацсетках. Такі сайт толькі візуальна падобны да банкаўскага, насамрэч гэта фішынгавая старонка, створаная зламыснікамі. Спроба ўвесці нумар карткі на такой старонцы можа прывесці да страты ўсіх сродкаў, якія ёсць на рахунку.
У МУС расказалі, як можна распазнаць падроблены сайт. "Дастаткова звярнуць увагу на даменнае імя — побач з афіцыйнай назвай будуць размешчаныя дадатковыя сімвалы. Акрамя таго, многія раздзелы будуць неактыўнымі або падчас кліку паведамяць пра памылку", — кажа намеснік начальніка галоўнага ўпраўлення па супрацьдзеянні кіберзлачыннасці Аляксандр Рынгевіч.
У МУС просяць пасля выяўлення падробленага рэсурсу зрабіць скрыншот і патэлефанаваць у міліцыю.
