Прадпрымальнікі Віцебска рыхтуюць для Лукашэнкі звесткі пра свой бізнэс
Віцебскія прадпрымальнікі вырашылі самі зрабіць аналіз свайго матэрыяльнага становішча.
На віцебскіх рынках цяпер працуе каля паловы індывідуальных прадпрымальнікаў. Хутка павінны выйсці на працу многія з тых, хто ўзяў вымушаны “адпачынак” пасля лютаўскай панікі. Людзі лічаць, што дамагліся свайго — на прадстаўнікоў дробнага бізнэсу хаця б звярнулі ўвагу.
Цяпер яны збіраюць статыстыку сваёй дзейнасці, каб паказаць афіцыйным органам сапраўднае становішча, у якім апынуліся прадпрымальнікі.
"Мы прапанавалі прадпрымальнікам здаць невялікую статыстыку, дзе будзе напісана іх валавая выручка за студзень і люты ды выдаткі, якія яны павінны сплочваць (арэнда, падаткі, іншае), — кажа Еўрарадыё Ірына Яскевіч, актывістка аргкамітэту па стварэнні прафсаюзу прадпрымальнікаў “Разам”. — З гэтых лічбаў будзе відаць, што прадпрымальнікі апынуліся ў такой сітуацыі, калі іх бізнэс проста вымывае іх уласныя грошы. Гэтыя лічбы хочам перадаць на нараду з удзелам прэзідэнта, дзе будзе канчаткова вырашацца наш лёс. Апытанне робім ананімна, так што лічбы маем атрымаць аб’ектыўныя".