Польшча зробіць усё, каб бліжэйшым часам Алесь Бяляцкі выйшаў на волю
Алесь Бяляцкі / pap.pl
Польшча зробіць усё, каб бліжэйшым часам беларускі палітвязень Алесь Бяляцкі выйшаў на волю. Пра гэта заявіў міністр замежных спраў Збігнеў Рау. Ён разам з прэм'ер-міністрам Матэвушам Маравецкім 21 сакавіка ў Варшаве сустракаўся з жонкай Бяляцкага Наталляй Пінчук.
"Міністр Рау запэўніў спадарыню Наталлю, што Польшча зробіць усё, каб бліжэйшым часам Алесь Бяляцкі выйшаў на волю, а калі гэтага не атрымаецца, Польшча працягне звяртаць увагу ўсяго свету на сітуацыю ўсіх палітычных вязняў у Беларусі", — цытуе словы прэс-сакратара МЗС Польшчы Лукаша Ясіны @byplradio.
22 сакавіка Наталля Пінчук сустрэнецца з прэзідэнтам Польшчы Анджэем Дудам.
Кіраўнік праваабарончага цэнтра "Вясна", Нобелеўскі лаўрэат Алесь Бяляцкі за кратамі ў Беларусі з лета 2021-га. У пачатку сакавіка сёлета ён быў асуджаны ў Мінску на 10 гадоў калоніі за дапамогу рэпрэсаваным беларусам.
